O Entorno
Uesca ye o zentro neuralchico d'una probinzia pribilechiada. Dende as zonas subdeserticas d'os Monegros dica as tucas d'o Pirineu, Uesca ufre a o bisitán una exzelén combinación d'o turismo más susegau a o turismo más actibo. A suya comarca constituye un espazio ubierto, encara por descubrir.
A suya belleza e as suyas multiples posibilidaz ufren una perfecta alternanzia entre una estacha reposada e un ozio activo e esportibo.
Uesca amuestra singulars racons, edefizios urbanos, lugars zercanos, patrimonio artistico e natural. Uesca ye a emozión d'una naturaleza biba.
Uesca ye arrodiada d'un rete de senders pa caminar, ir en bizi u a caballo. Armitas (San Chorche, Salas, Zillas, Jara, Santa Lucia, Loreto...), fuens, labercas u o castiello de Montaragón.
En a comarca d'a Plana, siempre a menos de trenta menutos, o castiello de Lobarre se lebanta como a fortaleza romanica millor consebada d'Europa. Os Mallos de Riglos e Agüero, o monesterio de Casbas e una ripa de lugars con encanto e istoria rodeyan una ziudat enclabada en plena naturaleza.
Chugar a golf en Arascués-Nueno, bolar en belero u abioneta en Monflorite, practicar Windsurf en Árguis u Tormos, deballar ríus en canoa u rafting en Galligo, puenting, apasiar-se a caballo en Uesca, escalar en Badiello, bolar en parapén, deballar barrancos ficando-se en o Parque Natural d'a Sierra e Cañons de Guara, tot se puede fer en Uesca.
A una ora de Uesca, o Pirineu nos combida de berano a descubrir paisaches molimentals, extensos bosques, ibons de montaña, puntas de más de tres mil metros e d'ibierno a practicar os esportes de nieu en as modernas instalazions ibernals de Fornigal, Pandicosa, Astún, Candanchú u Sarllé. Menzión espezial merexen magnificos paraches naturals como o Parque Nazional d'Ordesa e Tres Serols, as bals d'Ansó e Echo, Aragón, Tena e Benás, a Sierra de Guara, l'arte d'o Sarrablo, Sobrarbe e Ribagorza e a choya oculta d'Os Monegros.